Háteigsvegur 59

Við Háteigsveg 59 stendur nýr og framúrstefnulegur íbúðakjarni á vegum Félagsbústaða. Arnhildur Pálmadóttir hjá s.p.arkitektum/Lendager á Íslandi ehf. var arkitekt íbúðakjarnans og var verkefnið unnið í samstarfi við Húsnæðis- og mannvirkjastofnun. Hér er að finna nöfn allra þeirra sem komu að gerð fjölbýlisins.

Markvisst var unnið að því að hafa kolefnisfótspor byggingarinnar sem lægst og var endurnýtt hráefni notað eins og kostur var til þess að takmarka losun. Hringrásarhugsun var í fyrirrúmi frá byrjunarstigi verkefnisins til þess að tryggja skilvirkni endurnotkunar og endurnýtingu.

Steypa

Ósöluhæfar hellur úr framleiðslu BM Vallá voru muldar og notaðar sem steinefni í steypu (Berglind Plús) sem hafði C25 styrk. Þessi steypa var notuð í nokkrum hlutum bygingarinnar. Samanborið við hefðbundna C25 steypu reyndist kolefnisfótspor Berglind Plús vera allt að 40% lægra. Steypan uppfyllir allar kröfur en meðhöndlun hennar er örlítið ólík hefðbundinni steypu og þurfa verktakar sem vinna með hana að taka það til greina. 

Timbur

Timbur í klæðningu var ýmist áður notað í öðrum tilgangi eða ekki hægt að selja. Frá verktökum fékkst timbur sem hafði verið notað meðal annars í uppslátt. Húsasmiðjan skaffaði timbur sem hafði verið notað sem umbúðir fyrir aðrar vörur og frá Byko kom timbur sem hafði verið tekið úr sölu vegna yfirborðsfúa en hentaði vel í þessum tilgangi. Timbrið var brennt með sérhönnuðum gasbrennara til að gera eldtefjandi og rotvarnarhúð, samkvæmt japanskri aðferð sem heitir Yakisugi. Kostnaðurinn var mjög lágur, sérstaklega vegna þess að timbrið fékkst á góðum afslætti eða ókeypis. Brennsla timbrisins kostaði aukalega en að öllu meðtöldu var klæðningin ódýrari en til dæmis bárujárnsklæðning. 

Annað

Hluti glugga í íbúðakjarnanum eru gluggar sem annars hefðu ekki verið nýttir og fengust frá Gluggagerðinni. Einn samsettur gluggi var smíðaður úr sex endurnýttum gluggum og sjö nýjum gluggum, sem gaf byggingunni sérstakan blæ og jafnframt endurnýtti glugga sem hefði verið hent. Hurðir í geymslu voru endurnotaðar hurðir í eigu Félagsbústaða. 

Stafaparket úr beyki frá Danmörku (m.a. úr íþróttahúsum) var unnið upp og notað í allar íbúðir.

Steinflísar sem urðu afgangs við byggingu á nýrri skrifstofubyggingu Alþingis, Smiðju, voru nýttar í gólf í anddyri kjarnans. 

→ Lesið meira um verkefnið á síðu Byggjum grænni framtíð um verkefnið.